برادعى ايه اللى انت جاى تقـــول عليـــه

الهيصه بتاعه الدكتور البرادعى ان دلت علي شئ فانما تدل على ان الشعب المصرى عامل زى الغريق اللى متعلق فى قشايه . مع انه عارف ومقتنع تمامه ان القشايه لن تمنعه من الموت او الغرق

وان نحن كشعب مستعدون ومهيؤن نفسيا بقبول اى رئيس غير طويل العمر اللى راكب على انفاسنا من قبل الجيل بتاعى ما يتولد

يعنى مثلا لو الفنان شعبولا غلط فى حوار صحفى وقال انه ناوى يترشح , فى ثوانى هنعمل حمله تأييد على الفيس بوك الذى اصبح للمصريين كالماء والهــواء

هذه السطور لا تقلل من قيمه وشخص البرادعى او وطنيته لكن السؤال الان – ما هى مؤهلاته التى تجعله ان يكون رئيسا لدوله الفساد فيها اكبر من الفساد نفسه . دوله بتحاكم مدون فى محكمه عسكــريه كانه جاسوس حرب . دوله مش مؤمنه ان المرأه ممكن تكون قاضى او شئ آخر غير جسد

البرادعى راجل اكاديمى – عالم – ممكن يكون رئيس جامعه محترم او وزير تعليم او لحظه حلو وامه دعياله , يكون وزير خارجيه من أمثال صاحبنى اللى دايما يندد ويدين ويعارض ويجعع

خبره البرادعى الحزبيه والبرلمانيه اوخبرته بفساد المحليات معدومه؟ كيف يتعامل البرادعى مع شيوخ المنصر؟

واحد من المثقفين اياهم قالى ان البرادعى هو رمز التغير!! هو احنا لسه هندور على رمز؟؟؟؟ دا احنا غلبنا رموز : رمز النظاره – رمز الجمل – رمز الهلال – ورامز جلال

النقطه الايجابيه فى الموضوع ده هو مطالبته بتعديل الدستور والغاء المواد بتاعه رئيس بالتفصيل . هى دى البدايه : السعى لتعديل الدستور والغاء قانون الطوارئ وامن الدوله والمحاكم العسكريه

ولما الكمامات تتنزاح عن الافــواه... هتلاقى ناس كتير بدأت تتكلم

8 comments:

انحلت سيور العربه وسقط المهر من الاعياء said...

بص يا نجم

والله احنا بنتعقبت فى قشايه زى مقولت وكل موسم له القشه بتاعته يومين القشه بتاعة كفايه انتهت وقشة القضاه انتهت دلوقتى قشة البرادعى

ومستنينك انته يا زعيم تقش الكل
القشه الكبيره
وانا عليه الهيصه والزفه

هههههههههههههه
ودى بعض افكار الشعارات اللى ممكن نرفعهالك:



يا رافت يا مناضل احنا وراك بالمناجيل


يا رافت سير سير واحنا وراك ع المواسير


يا رافت يا همام يا موكلنا وراك حمام

الأغاني للرأفتاني said...

مواسير ايه ومناجيل ايه يا عم محمد هو انا مترشح ابقى نقيب السباكين
الايام اللى جايه سواد يامان
اوسخ من ايام احمد عرابى

عمر said...

يا رآفت باشا الفكرة في البرادعي مش شخصه ولكن قدرته علي ان الناس تتحرك بسببه والهدف تعديل الدستور الرقابة علي الانتخابات واظن دي اهداف كلنا نفسنا تتحقق

وانت اخبارك ايه من زمان؟

Iskanderani said...

مساء الفل يارأفت ،
وبقيت زعيم المواسير ومأكل الجوعانين وَمشّربْ العطاشَي وأنا كنت فاكر إنك مهاجر. والله أنا من رأي إن كل منّا يرجّع مصر ويرشح من أنفه قصدي يرشح نفسه في دائرة يرسمها له الزمن والسباكين علي المواسير يسيروا علي دربك ورائك وخلفي كمان ماهوا أحسن مني ومنك مافيش للحكم وإذا لزم ألأمر أتنازل لك علي الصعود للهاوية لأنني جربت في المهجر أكل البطيخ وطلوع المواسير. إنت جبت الفايدة، الغريق يتعلق في قشة والله كان أحسن له المقشة يتعلق فيها.

تحيات إسكندراني في بلاد الله الواسعة

الأغاني للرأفتاني said...

عمــــر
ايوووووه
انت فين يا عم. انا لسه جاى من باريس. انت فى مصر ولا لسه فى باريس فين ايامك يا شقيق
ابعت لى ايميل بتيلفيونك يا فى مصر يا باريس

بالنسبه للبرادعى
يا عم عمر هو احنا مستانين حد يحركنا علشان نتغير؟؟ يعنى الشعب ده لازم حد يقوله اتغير؟ ولاالظروف اللى زى الزفت دى المفروض تكون اشاره للتغير؟
الجيل بتاعنا ماشفش غير مبارك وقانون الطوارئ ولسه مستين برادعى يقولنا اتغيروا؟؟؟؟
******************************
اسكندرانى
يا استاذ ممدوح احنا خلاص ما ينفعش نعمل اى حاجه غير ان احنا نعيش فى المهجر
وبعدين احنا ما ننفعش نترشح لاى حاجه علشان احنا معانا جنسيات اجنبيه
يعنى ممكن نترشح لنقابه السباكين والمواسير
هههههههه

عمر said...

لا يا باشا هو مش مستني حد يقولوا غير بس لما يلاقي رمز بيطالب بالتغيير وأمن الدولة ميقدرش يقفشه يبقي الناس حتتشجع وتحس ان فيه امل

انا في نيويورك وكلمتلك علي نمرتك بس ما بتردش مش عارف لو انت غيرتها

المهم ابعتلي علي omarfarahat@yahoo.com

عشان نشوف ايه اخبارك

الأغاني للرأفتاني said...

أنت مفكر لو أمن الدوله لو عاوز يخلص م البرادعي هيغلب!! أنا اللي مش عجبني ان الشعب مستني حد يقوله أه والنبي تعالي اتغير . وواحد زي وزيك عاش بره أكثر ما عاش في مصر
النقطة الثانية هي احا جدا يا عمر ازاي تكون في نيويورك و ما تتصلش؟

عمر said...

يا عم انت انا كلمتك بتاع بسعتلاف مرة وانت ما متردش انا مش عارف لو معايا نمرة صح ولا لأ ابعتلي انت بس رقمك عالياهو وانا حكلمك

يا عم الناس والله ما مستنية حد يقولها تعالي اتغير الناس كفرانة وطالع عينها لكن لازم الناس تتعاون مع بعض عشان اي حاجة تتغير هي دي الميزة الاساسية للراجل انه ممكن الناس تنظم نفسها وتتعاون معاه غير الاشكال بتاعة المعارضة اللي كل واحد فيهم عايز يعمل فيها زعيم الأمة